Partage d'héritage entre les héritiers d'Alain du Pont : parchemin, scellé du sceau de la cour de Quimper, d'hermines plain passé passé devant Geffroy du Chef du Boys (Penfentenio) sénéchal de Cornouaille et Guillaume le Gall sénéchal de la cour des Réguaires pour un partage. 27 février 1358

• Description :

  Transcription:

  Sachent touz que (effacé) Jehan (effacé) et Haoys sa fame eussent demandé envers Noel dou Pont frere aizné de ladite fame (effacé) de ladite fame es heritages Alen dou Pont et Panthoat sa fame lour pere et mere et fere le partage dessus (?) à la coustume fust à gré dudit Noel (effacé) alzdits Jahan et sa fame par cause de cele fame es heritages et meubles de lours ditz pere et mere à la coustume et en oultre ont voulu (effacé) à gré que la partie desditz heritages de par lesditz pere et mere soet faite en la maniere que soufrent c'est assavoir que pour toute partie doet (effacé) que lesditz Jahan et sa fame par cause de cele fame peussent avoir en nule maniere en la messon audit Noel en laquele il demore à present la rue as Suors de Kempercorentin sise entre la messon Eon Coplant et sa fame d'une partie et la messon communale de l'autre, par cause et raeson de la succession de ladite Panthoat lour mere ne autremant ledit Noel o le gré et l'assentemant de Plaesou sa fame et ladite Plaesou (effacé) appartient devent bailler et baydront et dejà baillent donent et livrent asditz Jahan et sa fame chacun an par cause de cele fame quatre libvres de rante ou de cens chacun moys de janvier desus ladite messon et desus ses appartenances à paer audit Jahan et à sadite fame et à cause-ayant de cele fame à fin et perpetuel heritage à jamais, à l'us et à la coustume des autres censies de la vile de Kempercorentin et aynsin ladite messon toute enterement o toutes ses appartenances, doet, demorer et demorra afin et perpetuel heritage à jamais o ledit Noel et o sadite fame et o leurs hoirs et cause-ayantz d'eux et en oultre doet ledit Noel assoir asdictz Jahan et sa fame pour cause de cele fame vingt soilz de rante ou de cens perpetuel à lever chacun an en pur cens en la vile de Kempercorentin ou en ses appartenances en un place ou en dous places et jusques à tant que il les ayt assises il les paera par sa main chacun an et toutz les autres biens tant en heritages que en meubles de lours ditz pere et mere en quelque leu que ilz soient seront partitz de leur comun assentemant par my entre eulx et contribueront lesditz Jahan et sa fame en la sepulture et debtes de ladite mere tant come les biens de ladite mere durront et en plus large non, et en si remanant y a, auront lesditz Jahan et sa fame la mecte dudit ramanant desditz meubles sanz ce que ils soient tenuz de contribuer es laes du teusteament à cele mere que ele a faet de ses biens si ne le voulent de lour gré et en oultre d'aucunes peces de terre et heritages conquises, retretes et app'es à bas et à vante ou non dudit Noel come il doet , c'est assavoir toute la partie que Constance de Neiczbran avoet u pré Ely et dous seillons de terre et dous senquences ileques de costé où tenoet de Maesguidou, Item la mecté d'un parch sur le grant chemin qui mene à Croaespredou au devant la messon de Lesteren, Item un cortil et ses veilles mazeres apelé le cortil Alen Michaut jadis joste la messon apelee la messon à Lordest, Item dix soulz de rante sur la messon et le parc de Lesteren de la fille Alen Lucas et un pece de terre que ele avoet udit parc, Et une messon de Hervé filz Martin Guaseautrou à Maesmenechy, Et nueff seillons de terre joste le bordel jadis sur le grant chemin qui mene à la fontaene, Et un seillon de terre joste la messon Gorlouen et cinc soulz de rante ileques, Un place de messon à Ru Neustic en quele ledit Martin et sa fame soloient jadis demorer, lesditz Noel et sa fame ont voulu et greé et voulent pour l'affection et l'amour qu'ils avoient o ladite fame audit Jahan que ele ayt et prange la mecté esditz terres et heritages come ele prant ou remanant desdites terres et heritages de par elsditz pere et mere et quant à toutes les dites et chacune de eles tenir et acomplir de prent en prent sanz jamais venir ne pouvoir venir encontre celes fames autorizees de lours ditz maritz et chacune dite fame de sondit mari soffiseament quant à toutes les choses et chacune de eles desus et desouz escript en cestes letres ont obligé et obligent toutz lours biens heritages et meubles presentz et futurs, chacun en tant come à ly appartient et souz l'obligation des biens de chacun d'eulx. Et se devent et sont tenuz d'eulx entregarantir vers toutz et contre toutz au dret et à l'usage du pais et exspecialement ledit Noel come privee persone envers sadite fame et toutz ses hoirs et lours cause-ayantz, et quant as dites choses et chacune de eles non avoir volues greees et octroiees de lours bons grez et privez volontez et sanz nul sorfercement les dites fames o lesdites auctoritez à exception et privilege du dret de Velleyan sur ce acertené et exspecialement ladite fame dudit Jahan à benefice de (effacé) par cause de decevance et mynorité d'age et autrement et à toutes autres exceptions et allegances de dret et de coustume et statutz sauff à fere que contre la tenor de cestes presentes letres puot estre dites ne obitees en tout ne en partie et au dret disant de renonciation generale non valer, Toutes lesdites choses et chacune de eles tenir servir et acomplir chacun en sa maniere come dit est et devisé en chacun prent pardesuz sanz jamais venir encontre par eulx ne par autres par cause de minorité d'age ne autrement jurerent lesdites parties o ledites auctoritez pour eulx et lours heirs et lours successors quels que ils soioent sur les Seintes Evangiles touches, et furent lesdites parties à lours requestes et de lours assentemantz o lesdites auctoritez condepnees à les tenir o jugement et o les decretz et declarations des courts desouz escriptes bailles sur ces choses et sur chacune de eles. Doné et fait en la cour au duc à Kempercorentin et en la court seculiere Reverend Pere en Deux Monsieur Geffroy par la grace de Deux evesque de Cornoaille par devant Maestre Geffroy dou Chieff dou Boys seneschal de Cornoaille et Guillaume le Gall seneschal dudit Reverend Pere de sa court seculiere au tamps. Tesmoengs les selx des contraz d'icele court ensemble o le seel Guillaume le Gall pour lesditz Jahan et sa fame à lours prieres et requestes o ladite auctorité et o le seel Riou de Kaeranlen pour lesditz Noel et sa fame à lours prieres et requestes auxi o ladite auctorité le XXIe jour de fevrier en l'an mil IIIC cincquante et ouyt.

   

  Passé par Guillaume de K&&..ch

  [transcription par H. Torchet]

• Date :

  1358

• Description physique :

  Importance matérielle : 1 pièce

  Particularité physique : parchemin

• Identifiant :

  7 J 149

• Notes :

  La transcription de ce document a été réalisée par Hervé Torchet. (25/08/2014)